• Azərbaycan Respublikasının Dövlət Neft Fondu (ARDNF) “Enfinity Global” şirkətinə məxsus 402 MVt gücündə günəş elektrik stansiyalarından ibarət portfeldə 49%-lik pay əldə edib. Portfeldə 51 % təşkil etməklə nəzarət payını saxlayan “Enfinity Global” isə aktivlərin uzunmüddətli idarəçiliyini davam etdirəcəkdir.
• Portfel Latsio və Emiliya-Romanya regionlarında yerləşən 14 günəş elektrik stansiyasını əhatə edir. Bu stansiyalarda istehsal edilən enerji uzunmüddətli enerji alqı-satqı müqavilələri (PPA) əsasında satışa yönəldiləcəkdir.

Roma, İtaliya – 18 iyul 2025-ci il - ARDNF və bərpa olunan enerji sahəsində fəaliyyət göstərən beynəlxalq “Enfinity Global” şirkəti, İtaliyada yerləşən ümumi gücü 402 MVt olan günəş fotovoltaik (PV) elektrik stansiyalarından ibarət portfeldə ARDNF-nin 49%-lik pay əldə etməsini nəzərdə tutan müqavilə imzalayıb. Müqavilənin başa çatmasından sonra “Enfinity Global” 51%-lik payını qoruyaraq və İtaliyanın bərpa olunan enerji bazarındakı güclü mövqeyini möhkəmləndirərək bu aktivlərin effektiv idarəçiliyini həyata keçirəcəkdir.

Bu investisiya, ARDNF-nin uzunmüddətli investor kimi müəyyən edilmiş strateji hədəflərinə və mandatına uyğun şəkildə sabit və proqnozlaşdırıla bilən gəlir mənbəyi yaratmaqla yanaşı, eyni zamanda qlobal miqyasda dayanıqlı enerji keçidinə töhfə verir.

Razılaşma çərçivəsində “Enfinity Global” İtaliyadakı layihə portfelinə investisiya tərəfdaşlarını cəlb edir. Bu, şirkətə mövcud layihələr üzrə kapital dövriyyəsini təmin etməyə və İtaliya üzrə 2,6 GVt günəş enerjisi və 5,3 GVt enerji saxlama gücünə malik layihələrin həyata keçirilməsini sürətləndirməyə imkan verir. Nəticədə, şirkətin ölkədə müstəqil enerji istehsalçısı (IPP) kimi lider mövqeyi daha da möhkəmlənir.

İnvestisiya portfeli həm istismarda olan, həm də tikilməkdə olan və İtaliyanın Latsio və Emiliya-Romanya regionlarında yerləşən günəş elektrik stansiyalarını əhatə edir. İstehsal edilən elektrik enerjisinin uzunmüddətli enerji alqı-satqı müqavilələri (PPA) əsasında satışa çıxarılması nəticəsində istehlakçılar üçün sabit enerji tarifləri, investorlar üçün isə proqnozlaşdırıla bilən pul axınları təmin ediləcəkdir. Portfel üzrə stansiyaların illik təxminən 685 milyon kilovat-saat (GVts) həcmində təmiz elektrik enerjisi istehsal edəcəyi gözlənilir. Bu da hər il təqribən 184,950-ton karbon-dioksid ekvivalentində (CO₂e) emissiyanın azaldılması və 250 minə yaxın İtalyan ailəsinin illik enerji tələbatının qarşılanması deməkdir.

“Enfinity Global” şirkətinin baş icraçı direktoru Karlos Domeneç bildirib:“ARDNF -ni İtaliyadakı ilk müqavilə əsaslı fotovoltaik portfelimizə uzunmüddətli tərəfdaş və investor kimi cəlb etməkdən məmnunluq duyuruq. Bu investisiya bütün iştirakçı ölkələr, investorlar və istehlakçılar üçün qarşılıqlı faydalı olan davamlı enerjiyə keçidin parlaq nümunəsidir.”

ARDNF-nin İcraçı direktoru İsrafil Məmmədov qeyd edib: “Enfinity Global” ilə bu strateji tərəfdaşlıq vasitəsilə ARDNF dayanıqlı gəlir mənbəyi formalaşdırmaq ilə yanaşı, İtaliyanın artan enerji tələbatının qarşılanması üçün rəqabətqabiliyyətli və təmiz enerji təchizatına töhfə verir və eləcə də, yerli iqtisadi inkişafın və əhalinin enerji təminatının dəstəklənməsinə xidmət edir. Gələcək yönümlü qlobal institusional investor olaraq İtaliya və ümumilikdə Avropada strateji investisiya imkanlarını dəyərləndirməyə davam edəcəyik.”

Əməliyyat çərçivəsində “Enfinity Global” şirkətinə bir sıra məsləhətçi qurumlar tərəfindən dəstək göstərilmişdir. Şirkətə bu prosesdə “Mediobanca” maliyyə məsləhətçisi, “Legance” hüquqi məsləhətçi, “Fichtner” isə texniki məsləhətçi qismində xidmət göstərmişdir.
ARDNF isə sözügedən əməliyyat üzrə “JLL” tərəfindən birləşmə və satınalmalar üzrə, “Dentons Europe Studio Legale Tributario” tərəfindən hüquqi, “EY” tərəfindən maliyyə və vergi, “DNV” tərəfindən isə texniki məsləhət dəstəyi ilə təmin olunmuşdur.

ARDNF haqqında

1999-cu ildə təsis edilmiş ARDNF ölkənin neft və qaz gəlirlərinin toplanması və səmərəli idarə olunmasını təmin edən suveren sərvət fondudur. Fondun əsas məqsədi əldə olunan gəlirlərin uzunmüddətli və dayanıqlı şəkildə idarə olunaraq gələcək nəsillər üçün qorunması və artırılmasıdır. Hazırda məcmu aktivlərinin həcmi 60 milyard ABŞ dollarından çox olan ARDNF borc öhdəlikləri və pul bazarı alətləri, səhmlər, qızıl, daşınmaz əmlak və infrastruktur kimi müxtəlif sahələri əhatə edən, qlobal miqyasda geniş diversifikasiya olunmuş investisiya strategiyası həyata keçirir.

“Enfinity Global “haqqında

“Enfinity Global “və onun törəmə şirkətləri ABŞ - də yerləşən bərpa olunan enerji ilə dayanıqlı inkişaf xidmətləri sahəsində fəaliyyət göstərən aparıcı şirkətdir. 2019-cu ildə təsis edilmiş şirkətin portfelinə istismarda olan, inşası davam edən və inkişaf mərhələsində olan layihələr daxil olmaqla ümumilikdə 40 GVt həcmində bərpa olunan enerji və enerji saxlama aktivləri daxildir. Bununla yanaşı, “Enfinity” ABŞ ərazisində digər 37 GVt gücündə layihələr üzrə danışıqlar aparır. ABŞ, Avropa, Yaponiya və Hindistanda ofisləri fəaliyyət göstərən “Enfinity Global” aşağı karbonlu iqtisadiyyata keçidin sürətləndirilməsinə töhfə verməyi strateji məqsəd kimi müəyyən etmişdir. Şirkətin rəhbər komandası bərpa olunan enerji sahəsində qlobal səviyyədə ən təcrübəli heyətlərdən biri hesab olunur. Komanda indiyədək 26 GVt həcmində günəş və külək enerjisi layihələrinin inkişafı və satın alınmasında iştirak etmiş, həmçinin 41 milyard ABŞ dollarından artıq investisiya portfeli üzrə maliyyələşdirmə təcrübəsi toplamışdır.