Azərbaycan Respublikasının Dövlət Neft Fondu (Fond), 1999-cu ildə Azərbaycanın neft və qaz gəlirlərini indiki və gələcək nəsillərin mənafeyi naminə idarə edilməsi və qorunması məqsədilə yaradılmış suveren sərvət fondudur. Fond milli sərvətin qorunması, nəsillərarası ədalətin təmin edilməsi və davamlı iqtisadi inkişafın təşviqində mühüm rol oynayır.

Fond səhmlər, sabit gəlirli qiymətli kağızlar, daşınmaz əmlak və digər maliyyə alətləri də daxil olmaqla, investisiya portfelini idarə edir. Fondun investisiyaları uzunmüddətli maliyyə davamlılığını təmin etməyə və ölkənin iqtisadi sabitliyinə töhfə verməyə yönəlmiş strateji yanaşma ilə idarə olunur.

Fondda İnvestisiya departamentinin baş təhliçisi vakansiyasına müraciət etməklə siz, təşkilatın investisiya strategiyası və portfel idarəçiliyinə töhfə vermək imkanını əldə etmiş olursunuz. Vəzifə öhdəliklərinə investisiya təkliflərinin təhlili, yoxlamanın ( due diligence) aparılması və portfelin fəaliyyətinin monitorinqi də daxildir. Bu, Fondun Azərbaycanın suveren sərvətini davamlı şəkildə idarə etmə missiyasını dəstəkləyir.

Bu vəzifə Fondun alternativ investisiyalar (özəl səhmlər, daşınmaz əmlak və infrastruktur) üzrə investisiya imkanlarının təhlilini aparmaq və təkliflər hazırlamaq öhdəliklərini əhatə edir. Təhlilçi il ərzində 1-1.5 milyard ABŞ dolları həcmində alternativ investisiya portfelini idarə etməyə və məqbul göstəriciləri üstələyən gəlirlilik əldə etməyə yönəlmiş işlər görəcəkdir.

Siz hansı işləri görəcəksiniz?

• İnvestisiya imkanları üzrə kompleks maliyyə təhlili, bazar araşdırması və risk qiymətləndirilməsini aparmaq;
• Maliyyə modelləri qurmaq, nağd pul axınlarını proqnozlaşdırmaq, həssaslıq və ssenari təhlilləri aparmaq;
• İnvestisiya memorandumları və rəhbərliyə təqdimatlar hazırlamaq, İnvestisiya Komitəsi üçün materiallar tərtib etmək və strategiyaya uyğun təsdiq edilmiş investisiya planlarını icra etmək;
• Portfeli illik və dövri əsasda təhlil etmək, saxlama/satma qərarlarına dair təkliflər vermək;
• Portfelin daimi monitorinqini aparmaq, performansı qiymətləndirmək və uyğunlaşmanı təmin etmək;
• Yeni investisiya imkanlarının müəyyənləşdirilməsi və analitik təhlili üçün rəhbərliyin sorğularını cavablandırmaq;
• Maliyyə bazarları və sektorlar üzrə iqtisadi və institusional trendləri izləmək, uyğun təkliflər hazırlamaq;
• Yerli qanunvericiliyə uyğunluğun təmin olunması və prosedurların riayət edilməsinə nəzarət;
• Tərəfdaşlarla və maliyyə institutları ilə əlaqələrin qurulması və qorunmasını təmin etmək;
• İnvestisiya ilə bağlı fəaliyyətlərdə digər struktur bölmələrlə sıx əməkdaşlıq etmək.

Sizdən nə tələb olunur?

• Maliyyə, iqtisadiyyat, riyaziyyat, biznesin idarə olunması və ya əlaqəli sahədə bakalavr dərəcəsi (magistr dərəcəsi üstünlükdür);
• 4 ildən artıq korporativ maliyyə, M&A, investisiya analizi və ya oxşar sahələrdə iş təcrübəsi;
• Maliyyə modelləri qurmaq və maliyyə-statistik analizlər aparmaq üzrə yüksək bacarıq (MS Excel daxil olmaqla);
• Güclü analitik düşüncə, nəticə yönümlü yanaşma və strateji təqdimat bacarığı;
• Azərbaycan və ingilis dillərində yüksək səviyyəli yazılı və şifahi ünsiyyət bacarığı;
• CFA, ACCA və digər müvafiq beynəlxalq maliyyə sertifikatlarına malik olmaq üstünlükdür.

Axtardığımız namizəd kimdir?

Yüksək nəzəri biliklərə və zəruri texniki bacarıqlara malik olmaq, təqdimat, kommunikasiya və danışıqlar (negotiation) bacarıqlarının yüksək səviyyədə olması, eləcə də fikirlərini səlis və aydın şəkildə ifadə etmək qabiliyyəti üstünlük hesab olunur.

Maraqlısınız?

Güclü komandada çalışaraq investisiya sahəsində karyeranızı inkişaf etdirmək istəyirsinizsə aşağıdakı link üzrə keçid edərək işə qəbul sistemimiz vasitəsilə müraciət edin. Müraciətlər elan müddəti boyunca davamlı olaraq nəzərdən keçiriləcəkdir. Tərəfimizdən yalnız uyğun namizədlər ilə əlaqə saxlanılacaqdır.

Müraciətlər 1 sentyabr 2025-ci il tarixinədək qəbul edilir.