2015-ci il sentyabr ayının 29-30-da İtaliyanın Milan şəhərində Suveren Fondların Beynəlxalq Forumunun (SFBF) 7-ci iclası keçirilmişdir. Azərbaycan Respublikası Dövlət Neft Fondunun (ARDNF) İcraçı direktoru Şahmar Mövsumovun rəhbərlik etdiyi nümayəndə heyəti iclasda iştirak etmişdir.

İclas zamanı SFBF üzvləri 2014-cü ildə Dohada keçirilmiş görüşdə müəyyən edilmiş öhdəliklər barəsində fikir mübadiləsi etmiş, investisiya və risklərin idarə edilməsi, daxili idarəçilik məsələləri ətrafında təcrübə mübadiləsi aparmışlar. Bundan əlavə SFBF-nin yeni İdarə heyətinə yeni üzvlər seçilmiş (“Abu Dhabi Investment Authority”, “Qatar Investment Authority”, “GIC Private Limited” və “China Investment Corporation”) və 9-cu iclasın 2017-ci ildə Samruk-Kaznya ASC təfərindən Qazaxıstanda təşkil ediləcəyi elan edilmişdir. 2016-cı ildə baş tutacaq iclas Yeni Zelandiyanın suveren fondu tərəfindən Aukland şəhərində təşkil ediləcəkdir.

Suveren Fondların Beynəlxalq Forumu Suveren Fondların Beynəlxalq İşçi Qrupunun 2009-cu il aprelin 5-6-da Əl-Küveyt şəhərində keçirilmiş iclasında yaradılmışdır və ilk rəsmi iclasını 2009-cu il 8-9 oktyabr tarixlərində Bakı şəhərində keçirmişdir. SFBF könüllü qrup olub, əsas məqsədi Suveren Fondların ümumi maraqlarına dair məsələlər ətrafında fikir mübadiləsi aparmaq və Santyaqo prinsipləri və Suveren Fondların fəaliyyətinin anlaşılmasını asanlaşdırmaqdır.