Azərbaycan Respublikası Dövlət Neft Fondunun (ARDNF) nümayəndə heyəti 02 aprel 2024-cü il tarixində Dördüncü Sənaye İnqilabının Təhlili və Koordinasiya Mərkəzi, Avropa Yenidənqurma və İnkişaf Bankı və “StrategEast” təşkilatının birgə əməkdaşlığı ilə regionlarda informasiya texnologiyaları sahəsində bilik və bacarıqların artırılması, bu sahəyə investisiyaların cəlbi, yeni iş yerləri və karyera imkanlarının yaradılması prosesinə dəstək olmaq məqsədilə həyata keçirilən “IT Hub Azerbaijan” layihəsinin bağlanış mərasimi çərçivəsində Bakı Ali Neft Məktəbində təşkil olunmuş karyera sərgisində iştirak edib.

“İT HUB Azərbaycan - Gələcək iş, gələcəyi dəyiş!” adlı karyera sərgisinə ARDNF- lə yanaşı,bir sıra dövlət qurumları, eləcə də, aparıcı yerli və xarici şirkətlər daxil olmaqla ümumilikdə 60-a yaxın təşkilat qatılıb.

Sözügedən sərgidə ARDNF-nin İnsan resursları departamenti və İnformasiya sistemləri və rəqəmsal əməliyyatlar departamentinin əməkdaşları tərəfindən Fondda İKT üzrə vakant iş yerləri, təcrübə proqramları, habelə, karyera imkanları barədə sonuncu kurs tələbələri və məzunlara ətraflı məlumat verilib.

500-ə yaxın iş yeri və müxtəlif təcrübə proqramlarının təqdim olunduğu sərgiyə 1000 nəfərə yaxın gənc qatılıb.