17 mart 2005-ci ildə Londonun “Kraliça II Yelizaveta Konfrans Mərkəzi”ndə Böyük Britaniya hökumətinin təşkilatçılığı ilə Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsü (MHŞT) üzrə 2-ci beynəlxalq Konfrans keçirilmişdir. 17 iyun 2003-cü ildə keçirilmiş MHŞT üzrə ilk yüksək səviyyəli tədbirin davamı olan bu Konfransda 40-a yaxın ölkənin hökumət nümayəndələri, beynəlxalq maliyyə institutlarının, hasilat sənayelərinin və vətəndaş cəmiyyətinin təmsilçiləri iştirak etmişlər.

Konfransın əsas məqsədi MHŞT-nin həyata keçirilməsi sahəsində ayrı-ayrı ölkələrdə əldə edilmiş irəliləyişləri nəzərdən keçirmək olub. Bundan başqa Konfrans MHŞT-ni dəstəkləyən hökumət, hasilat sənayesi və vətəndaş cəmiyyəti nümayəndələrinin beynəlxalq əməkdaşlığını birləşdirmək və gücləndirmək üçün imkan yaratmaq niyyəti daşıyıb. Müxtəlif ölkələri və qurumları təmsil edən nümayəndələr bəzi ölkələrin neft, qaz və qızıl hasilatı sahəsindən əldə edilmiş gəlirlərin idarə olunmasında şəffaflığın təmin edilməsi istiqamətində atdığı mühüm addımları yüksək qiymətləndirmiş, MHŞT-nin tətbiqində pilot ölkə kimi 4 dövlətin – Azərbaycan, Qana, Qırğızıstan Respublikası və Nigeriyanın əldə etdiyi irəliləyişləri xüsusi olaraq alqışlamışlar.

Konfransı açan Dünya Bankının Prezidenti cənab Ceyms Volfenson bəyan etmişdir ki, Təşəbbüs yaxşı idarəetmə üçün əsas prinsip və mühüm başlanğıc nöqtəsidir. Onun sözlərinə görə Təşəbbüs gəlirlərdən yanlış istifadənin və korrupsiyanın qarşısını alır və makroiqtisadi idarəetməni güçləndirir. Cənab Volfenson bildirmişdir ki, Dünya Bankı MHŞT-ə qoşulmamış ölkələrə investisiya qoymayacaq.